ब्रिटिशांच्या गुलामगिरीतून देशाची मुक्तता करण्यासाठी आणि गोरगरीब कष्टकऱ्यांच्या सुखासमाधानाचे स्वराज्य साकारण्यासाठी प्रशिक्षित मनुष्यबळ व नवे नेतृत्व तयार करणे आवश्यक होते. या हेतूने कुंडलला प्रतिसरकारचे लष्करी प्रशिक्षण केंद्र जी. डी. बापू लाड यांच्या नेतृत्वाखाली सुरू करण्यात आले.

    गावोगावचे तडफदार तरुण एकत्र करून जी. डी. बापूंच्या कठोर शिस्तीखाली त्यांना लष्करी प्रशिक्षण दिले जाऊ लागले. त्यातून तुफानसेना तयार झाली. त्या तुफान सेनेचे फिल्डमार्शल- सरसेनापती जी. डी. बापू लाड होते. या लष्करी प्रशिक्षण केंद्रात तरुणांना कुस्तीपासून पिस्तूल - रायफली चालविण्याचे प्रशिक्षण दिले जात असे. बौद्धिकांचे आय़ोजनही केले जात असे. तुफान सेनेच्या माध्यमातून प्रतिसरकारचे अनेक विधायक उपक्रमही यशस्वीपणे राबविले गेले. त्यामुळे स्वातंत्र्य लढ्याला लोकांचे पाठबळ मिळाले.

    तुफानसेनेचे फिल्डमार्शल जी. डी. बापू लाड यांच्या नेतृत्वाखाली खेड्यापाड्यातून जनता कोर्ट भरवली जात. गोरगरिबांच्या जमिनी बळकावणारे, माता-भगिनींवर अन्याय-अत्याचार करणारे, चोर-दरोडेखोर, क्रांतिकारकांची माहिती पोलिसांना देणारे खबरे, अशा समाजकंटकांची काळी यादी तयार केली जात असे. ठरलेल्या दिवशी व गावी अशा समाजकंटकांना व गावाच्या परिसरातील जनतेला गुप्तपणे निरोप पाठवून एकत्र केले जात असे.

    जी. डी. बापू तुफानसेनेसह तेथे हजर असत. वादी प्रतिवादी आपली बाजू जमलेल्या लोकांसमोर मांडत असत. जमलेल्या लोकांकडून निकाल घेतला जात असे. त्यावेळचे वातावरण व जमलेल्या जनसमुदायाच्या भावना पाहूनच वादी प्रतिवादी दिलेल्या न्यायाचा स्वीकार करीत असत. जनता कोर्टामुळे गुन्ह्यांची जाहीर चौकशी होऊन गुन्हेगारांना भरपाई देण्यास भाग पाडले जात असे. अस्तित्वात असलेल्या सरकारी यंत्रणेकडून त्याच्या नोंदी करून त्यास कायदेशीर रूप दिले जाई.